13.03.2025

Më 13 mars 2025, Zana Hoxha udhëhoqi një punëtori frymëzuese me titull “Barazia Gjinore në Produksionet Artistike”, ku morën pjesë 16 individë nga fusha të ndryshme artistike për të diskutuar kritiksht mbi pabarazitë gjinore në industrinë kreative. Punëtoria u fokusua në shqyrtimin e barrierave strukturore, përfaqësimit dhe dinamikave të pushtetit që formësojnë krijimin dhe prodhimin artistik.

Përmes një kombinimi të prezantimeve, diskutimeve në grupe dhe ushtrimeve interaktive, pjesëmarrësit analizuan sfidat që hasin gratë dhe grupet e margjinalizuara në botën e artit, si dhe strategjitë feministe për të sfiduar dhe shkatërruar këto barriera.

Punëtoria filloi me një ushtrim ngrohës, “Kush Ka Pushtetin?”, i cili i inkurajoi pjesëmarrësit të reflektonin mbi strukturat e pushtetit gjinor në mjediset e tyre artistike. Kjo u pasua nga një shqyrtim i thellë i hendekut gjinor në art dhe kulturë, me statistika dhe studime rasti që theksuan barrierat e mëdha për përfaqësim të barabartë, siç janë disbalancat në financim, dukshmëri, role udhëheqëse dhe hendeku i pagave. Pjesëmarrësit gjithashtu hartuan hierarkitë gjinore në fushat e tyre artistike, duke identifikuar shpërndarjen e padrejtë të pushtetit.

Një nga momentet më të fuqishme të punëtorisë ishte kur tre grupe prej tre pjesëmarrësish secili improvizuan nga një skenë teatrore, e cila trajtoi aspekte të ndryshme të pabarazisë gjinore në botën e artit. Këto performanca spontane ofruan mundësinë e fuqishme për pjesëmarrësit të reflektonin dhe të diskutonin mbi çështjet në fjalë. Skenat teatrale jo vetëm që ngritën ndërgjegjësimin për sfidat që përballen gratë dhe grupet e margjinalizuara në prodhimin e artit, por gjithashtu ndezën diskutime të thella mbi mundësitë e zgjidhjes dhe krijimin e hapësirave më gjithëpërfshirëse.

Punëtoria përfundoi me adresimin e paragjykimeve gjinore në produksionet artistike dhe ndanë mësimet kyçe që morën. Ky aktivitet krijoi një ndjenjë solidariteti dhe inkurajoi mundësi të ardhshme bashkëpunimi, duke lënë pjesëmarrësit të frymëzuar për të mbrojtur barazinë gjinore dhe për të zbatuar mjetet dhe strategjitë e diskutuara në praktikat e tyre artistike.

Ky aktivitet është pjesë e projektit të Creative Europe UNMASC! Promovimi i Drejtësisë Gjinore përmes Teatrit.