05.11.2021

Nxënësit e “Shkollës së Gjelbër” me shfaqje për rëndësinë e shëndetit mendor

Shëndeti mendor ka një rëndësi të madhe, veçanërisht tek fëmijët, prandaj duhet të përkujdesemi për veten dhe për ata që na rrethojnë. Ky ishte mesazhi që përçuan nxënësit e klubit teatror të SHFMU “Shkolla e Gjelbër” përmes shfaqjes forum teatër “Mendime të Maskuara”.

Nën mentorimin e aktorit të Trupës Artistike të Artpolis, Edlir Gashi, nxënësit e kësaj shkolle më 5 nëntor trajtuan temën tabu për shëndetin mendor, për të cilin nuk flitet fare në shkolla e në familje.

Përballja me “mendimet e maskuara” e sfidojnë një adoleshente, e cila gjithnjë e më shumë humb vetëbesimin. Përmes kësaj shfaqje nxënësit treguan se me çfarë situatash mund të ballafaqohen fëmijët, si ndihen e çfarë kalon në mendjen e tyre.

E kjo temë ngacmoi edhe publikun, që ishte shumë aktiv me pyetje e komente nga më të ndryshmet. Duke filluar nga pyetjet për prindërit, nxënësen, por edhe institucionin e shkollës se çfarë në të vërtetë bëjnë për t’iu dalë në ndihmë nxënësve që përballen me probleme të tilla.

“Ky projekt organizohet nga Artpolis – Qendra për Art dhe Komunitet, me përkrahjen e GIZ Kosovo në emër të Qeverisë Gjermane”

#artpolis #giz #shkollatkampione #forum #teater