16.11.2023

Më 16 nëntor, një grup prej 17 vajzave morën pjesë në një sesion trajnimi me fokus feminizmin. Gjatë kësaj përvoje fuqizuese, vajzat shfrytëzuan mundësinë për të thelluar të kuptuarit e tyre për konceptet feministe duke ndarë hapur sfidat dhe problemet e përditshme me të cilat përballen.

Drejtuese e trajnimit ishte aktivistja Liridona Osmanaj, e cila u thellua me pasion në aspekte të ndryshme të feminizmit. Osmanaj trajtoi tema të tilla si terminologjia feministe, valët historike të feminizmit, lëvizjet dhe fushatat e ndryshme feministe dhe metodat praktike për fuqizim. Përtej mësimit tradicional, vajzat u angazhuan në mënyrë aktive në procesin e të mësuarit duke organizuar një kuiz dhe lojëra të tjera të këndshme, duke i dhënë një dimension dinamik dhe ndërveprues eksplorimit të parimeve feministe. Sesioni u tregua jo vetëm edukativ, por edhe një hapësirë e gjallë dhe bashkëpunuese për nxitjen e një vlerësimi më të thellë të feminizmit.

Sonila Pllashniku, pjesëmarrëse, është shprehur se ky trajnim ka pasur shumë efekt tek ajo, por edhe tek vajzat e tjera dhe ka sjellë bashkëpunim tyre dhe trajneres.

“Kjo ka ndikuar që ne me e pa feminizmin si diçka të bukur, si një lëvizje përmes së cilës ne mund të ndryshojmë diçka në vendin tonë. Është shumë e rëndësishme ta kuptojmë më thellë se çka është feminizmi, jo thjeshtë me e pa si një lëvizje që ka ndodhë në një kohë të caktuar, për një gjë të caktuar. Poashtu kisha inkurajuar edhe të gjithë djemtë me ndjekë trajnime të tilla, me e thellu bashkëpunimin me njëri-tjetrin dhe me i respektu të dy gjinitë”, ka thënë ajo.

Ajo ka pasur edhe një mesazh për krejt vajzat dhe gratë në Kosovë, “… mos me leju me na u shkelë të drejtat tona, me e ngritë zanin për çdo padrejtësi edhe me tregu që krejt çka neve na duhet është mundësia e barabartë; potencialin e kemi, forcën e kemi, të gjitha i kemi – thjeshtë na duhet një mundësi e barabartë që të mund ta shprehim natyrën tonë.”

Trajnimi “Edukimi i grave të reja mbi feminizmin” i Artpolis përkrahet nga programi i Fondacionit

Kosovar për Shoqëri Civile (KCSF) ‘EJA Kosovë’, bashkëfinancuar nga Agjencia Zvicerane për Zhvillim

dhe Bashkëpunim (SDC), Suedia dhe Qeveria e Dukatit të Madh të Luksemburgut.

#artpolis #kcsf #feminist