23.03.2026

Më 23 mars 2026, në Lipjan u themelua Klubi Teatror – një hapësirë krijuese dhe edukative që synon të fuqizojë të rinjtë përmes artit skenik dhe angazhimit social. Nën mentorimin e aktorëve Ismail Kasumi dhe Rabije Kryeziu, ky klub vjen si një platformë e gjallë ku arti dhe edukimi ndërthuren për të nxitur reflektim, shprehje dhe zhvillim personal.

Përgjatë këtij procesi, të rinjtë do të përfshihen në të gjitha fazat e krijimit të një shfaqjeje teatrore – nga zhvillimi i idesë dhe ndërtimi i dramaturgjisë, te provat, interpretimi dhe prezantimi final. Duke u fokusuar në tema sociale, ata do të krijojnë një shfaqje që reflekton realitetet dhe sfidat e shoqërisë, duke e shndërruar teatrin në një mjet dialogu dhe ndërgjegjësimi.

Përtej aspektit artistik, Klubi Teatror synon të kultivojë edhe një sërë aftësish jetësore të domosdoshme për të rinjtë. Përmes punës në grup dhe angazhimit të vazhdueshëm, pjesëmarrësit do të zhvillojnë disiplinën, menaxhimin e kohës, mendimin kritik dhe kreativ, aftësitë e komunikimit dhe të të folurit në publik. Po ashtu, ata do të forcojnë bashkëpunimin, empatinë, zgjidhjen e problemeve, vetëbesimin dhe aftësinë për të marrë përgjegjësi në një proces kolektiv.

Klubi Teatror në Lipjan është një hap drejt ndërtimit të një komuniteti të ri të vetëdijshëm, të angazhuar dhe të aftë për të artikuluar zërin e vet përmes artit.

Ky aktivitet organizohet nga Artpolis me mbështetje të Frieda dhe Ministrisë së Kulturës dhe Turizmit.